ನಟಿ ಮಾಲಾಶ್ರೀ ಕೋರಿಕೆ ಈಡೇರಿಸಿದ ತುಳು ನಾಡಿನ ದೈವ: ಹರಕೆ ತೀರಿಸಿದ ನಟಿ

ತುಳುನಾಡಿನ ದೈವಗಳ ಬಗ್ಗೆ ಮತ್ತು ಅವುಗಳ ಶಕ್ತಿ ಹಾಗೂ ಪವಾಡಗಳನ್ನು ಕುರಿತಾಗಿ ಇತ್ತೀಚಿಗೆ ಸಾಕಷ್ಟು ಸುದ್ದಿಗಳಾಗುತ್ತಲೇ ಇದೆ. ವಿಶೇಷವಾಗಿ ಕಾಂತಾರ ಸಿನಿಮಾದ ನಂತರ ತುಳು ನಾಡಿನ ದೈವಗಳನ್ನು ಆರಾಧಿಸುವವರ ಸಂಖ್ಯೆ ಕೂಡಾ ಹೆಚ್ಚಾಗುತ್ತಿದೆ. ಕೊರಗಜ್ಜನ ಆರಾಧನೆ ಮಾಡುವವರು ಹೆಚ್ಚಾಗುತ್ತಿದ್ದಾರೆ. ಇದೀಗ ಕೊರಗಜ್ಜನ ಪವಾಡದಿಂದ ಸ್ಯಾಂಡಲ್ವಡ್ ನ ಹಿರಿಯ ನಟಿ ಮಾಲಾಶ್ರೀ ಅವರ ಬದುಕಿನಲ್ಲೊಂದು ಬದಲಾವಣೆ ಆಗಿದೆ ಎನ್ನಲಾಗಿದೆ.

ನಟಿ ಮಾಲಾಶ್ರೀ ಅವರು ಮಂಗಳೂರಿನ ಕೊರಗಜ್ಜನ(Koragajja) ಆದಿಸ್ಥಳಕ್ಕೆ ಭೇಟಿ ನೀಡಿದ್ದಾರೆ. ಇದೇ ಆಗಸ್ಟ್ 10 ರಂದು ನಟಿ ಮಾಲಾಶ್ರೀ ಅವರ ಜನ್ಮದಿನವಾಗಿತ್ತು. ಆ ದಿನಕ್ಕೆ ಒಂದು ದಿನ ಮುಂಚಿತವಾಗಿಯೇ ನಟಿಯು ಕೊರಗಜ್ಜನ ಸನ್ನಿಧಾನಕ್ಕೆ ತಮ್ಮ ಕುಟುಂಬ ಮತ್ತು ಸ್ನೇಹಿತರೊಡನೆ ಭೇಟಿ ನೀಡಿದ್ದಾರೆ. ಅಲ್ಲಿ ಅವರು ಬ ವಿಶೇಷ ಪೂಜೆಯನ್ನು ಸಲ್ಲಿಸಿದ್ದು, ಭಕ್ತಿಯಿಂದ ಕೊರಗಜ್ಜನ ಆರಾಧನೆ ಮಾಡಿದ್ದಾರೆ.

ಮಾಲಾಶ್ರೀ ಅವರು ಈ ದೈವದ ಬಳಿ ಒಂದು ಸಂಕಲ್ಪವನ್ನು ಮಾಡಿದ್ದರು ಎನ್ನಲಾಗಿದ್ದು, ದೈವ ಅವರ ಕೋರಿಕೆಯನ್ನು ಈಡೇರಿಸಿದ್ದು, ಮೂರೇ ತಿಂಗಳಲ್ಲಿ ಬೇಡಿಕೆ ಈಡೇರಿಸಿದ ಕೊರಗಜ್ಜನ ಕುತ್ತಾರು ಆದಿಸ್ಥಳಕ್ಕೆ ನಟಿ ಮಾಲಾಶ್ರೀ ಅವರು ಬಂದು ತಮ್ಮ ಹರಕೆಯನ್ನು ತೀರಿಸಿದ್ದಾರೆ. ಮಾಲಾಶ್ರೀ ಅವರ ಜೊತೆಗೆ ಅವರ ಪುತ್ರಿ ಕೂಡಾ ಕ್ಷೇತ್ರಕ್ಕೆ ಆಗಮಿಸಿದ್ದರು. ಈ ವೇಳೆ ಮಾತನಾಡಿದ ನಟಿ ಮೂರು ತಿಂಗಳ ಹಿಂದಷ್ಟೇ ಕೊರಗಜ್ಜನ ಕಟ್ಟೆಗೆ ಬಂದು ಬೇಡಿಕೊಂಡಿದ್ದೆವು.

ಎಲ್ಲವೂ ನಮ್ಮ ಖುಷಿಯಂತೆ ನಾವು ಅಂದುಕೊಂಡ ಹಾಗೆ ಆಗಿದೆ. ಈ ಕ್ಷೇತ್ರದಲ್ಲಿ ಬಹಳಷ್ಟು ಪಾಸಿಟಿವ್ ಎನರ್ಜಿ ಇದ್ದು, ಒಳಗೆ ಹೋಗುವ ಸಮಯದಲ್ಲೇ ನಮಗೆ ಈ ಸಾನಿಧ್ಯದ ಶಕ್ತಿ ಭಾಸವಾಗುತ್ತದೆ ಎಂದಿದ್ದಾರೆ ನಟಿ. ತಮ್ಮ ಬೇಡಿಕೆ ಈಡೇರಿದ್ದು, ಹರಕೆಯನ್ನು ತೀರಿಸಿ ಮತ್ತೆ ಆಶೀರ್ವಾದ ಪಡೆಯುವುದಕ್ಕಾಗಿ ಕುಟುಂಬ ಹಾಗೂ ಸ್ನೇಹಿತರ ಜೊತೆಗೆ ಬಂದಿದ್ದು ಮುಂದೆಯೂ ಬರುವುದಾಗಿ ನಟಿ ಹೇಳಿದ್ದಾರೆ.