ಸ್ಯಾಂಡಲ್ವುಡ್ ನಟ ಕಿಚ್ಚ ಸುದೀಪ್ ಅವರು ವಿಕ್ರಾಂತ್ ರೋಣ’ ನಂತರ ಯಾವ ಸಿನಿಮಾದಲ್ಲಿ ನಟಿಸಲಿದ್ದಾರೆ, ಎಂತಹ ಪಾತ್ರದ ಮೂಲಕ ಅಭಿಮಾನಿಗಳ ಮುಂದೆ ಬರ್ತಾರೆ ಅನ್ನೋದನ್ನು ತಿಳಿಯೋ ಆಸಕ್ತಿ, ಕುತೂಹಲ ಎರಡೂ ಸಹಾ ಅವರ ಅಭಿಮಾನಿಗಳಿಗೆ ಹಾಗೂ ಸಿನಿ ಪ್ರೇಮಿಗಳಿಗೆ ಇದೆ. ಈಗ ಇದಕ್ಕೆ ಉತ್ತರ ಸಿಗುವ ಸಮಯ ಬಂದಾಗಿದೆ. ನಟ ಸುದೀಪ್ ನಟಿಸುತ್ತಿರುವ ಅವರ ಮುಂದಿನ ಸಿನಿಮಾದ ಟೀಸರ್ ಬಿಡುಗಡೆ ಆಗಿದೆ. ಸುದೀಪ್ ಅವರ ಹೊಸ ಸಿನಿಮಾವನ್ನು ತಮಿಳಿನ ನಿರ್ಮಾಪಕ ಕಲೈಪುಲಿ ಎಸ್. ತನು ನಿರ್ಮಾಣ ಮಾಡುತ್ತಿದ್ದಾರೆ.
ಇನ್ನು ಈ ಸಿನಿಮಾದ ನಿರ್ದೇಶನದ ಜವಾಬ್ದಾರಿಯನ್ನು ವಿಜಯ್ ಕಾರ್ತಿಕೇಯ ತಮ್ಮ ಹೆಗಲಿಗೆ ಏರಿಸಿಕೊಂಡಿದ್ದಾರೆ. ಈ ಸಿನಿಮಾ ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ಸಿನಿ ಪ್ರೇಮಿಗಳ ಮುಂದೆ ಬರಲಿದೆ. ವಿಶ್ರಾಂತ್ ರೋಣ ಸಿನಿಮಾದ ನಂತರ ಸುದೀಪ್ ಅವರು ಒಂದು ಬ್ರೇಕ್ ಪಡೆದಿದ್ದರು. ಅವರ ಹೊಸ ಸಿನಿಮಾದ ಕುರಿತಾಗಿ ಇದು ಸಾಕಷ್ಟು ಕುತೂಹಲಕ್ಕೆ ಕಾರಣವಾಗಿತ್ತು. ಸುದೀಪ್ ಅವರು ಕ್ರಿಕೆಟ್ ಟೂರ್ನಿಮೆಂಟ್ ಗಳು ಅನಂತರ ಚುನಾವಣೆ ವೇಳೆ ಅಭ್ಯರ್ಥಿಗಳ ಪರ ಪ್ರಚಾರ ಕಾರ್ಯ ಹೀಗೆ ಸಾಕಷ್ಟು ಬ್ಯುಸಿಯಾಗಿದ್ದರಿಂದ ಸಿನಿಮಾ ಕಾರ್ಯಗಳಲ್ಲಿ ಅವರು ತೊಡಗಿಕೊಂಡಿರಲಿಲ್ಲ.
ತಮ್ಮ ಅಭಿಮಾನ ನಟನ ಸಿನಿಮಾ ಯಾವಾಗ ಎನ್ನುವ ನಿರೀಕ್ಷೆಯಲ್ಲಿದ್ದವರಿಗೆ ಸುದೀಪ್ ಅವರೊಂದು ಬಹಿರಂಗ ಪತ್ರದ ಮೂಲಕ ಹೊಸ ಸಿನಿಮಾದ ಅಪ್ಡೇಟ್ ಶೀಘ್ರದಲ್ಲೇ ಸಿಗುತ್ತದೆ ಎನ್ನುವ ಮಾಹಿತಿಯನ್ನು ನೀಡಿದ್ದರು. ಈಗ ಅದರಂತೆ ಕಿಚ್ಚ 46 ಸಿನಿಮಾದ ಟೀಸರ್ ಬಿಡುಗಡೆ ಆಗಿದ್ದು, ಅಭಿಮಾನಿಗಳಿಗೆ ಕಿಕ್ ನೀಡಿದೆ. ನಾನು ಮನುಷ್ಯ ಅಲ್ಲ ರಾಕ್ಷಸ ಎನ್ನುವ ಡೈಲಾಗ್ ನೊಂದಿಗೆ ಗನ್ ಹಿಡ್ಕೊಂಡು, ಸಿಗರೇಟ್ ಸೇದುತ್ತಾ ನೀಡೋ ಕಿಚ್ಚನ ಜಬರ್ದಸ್ತ್ ಎಂಟ್ರಿಗೆ ಫ್ಯಾನ್ಸ್ ಫಿದಾ ಆಗ್ತಿದ್ದಾರೆ.
ಕೊಲ್ಲಲು ಬಂದವರ ಮೇಲೆ ನಾಯಕ ಅಬ್ಬರಿಸುವ ದೃಶ್ಯ ಸಿಕ್ಕಾಪಪಟ್ಟೆ ಮಾಸ್ ಆಗಿದೆ. K46 ಟೀಸರ್ ನಲ್ಲಿನ ಸುದೀಪ್ ಖಡಕ್ ಲುಕ್, ಖದರ್ ಇರೋ ಡೈಲಾಗ್, ಅದಕ್ಕೆ ತಕ್ಕಂತಹ ಅಭಿನಯ ನೋಡುಗರ ಮೇಲೆ ಮೋಡಿ ಮಾಡಿದೆ. ಈ ಸಿನಿಮಾ ಐದು ಭಾಷೆಗಳಲ್ಲಿ ತೆರೆಗೆ ಬರಲಿದೆ. ಟೀಸರ್ ನೋಡಿದ ಮೇಲೆ ಈಗ ಸಹಜವಾಗಿಯೇ ಅಭಿಮಾನಿಗಳು ಮತ್ತು ಸಿನಿ ಪ್ರೇಮಿಗಳಿಗೆ ಸಿನಿಮಾ ಕಥೆಯ ಮೇಲಿನ ನಿರೀಕ್ಷೆಗಳು ದುಪ್ಪಟ್ಟಾಗಿದೆ.