ಕೆಜಿಎಫ್-2 ಸಿನಿಮಾ ಬಂದು ವರ್ಷವಾಗಿದೆ. ಕೆಜಿಎಫ್ ಸರಣಿ ಸಿನಿಮಾಗಳ ಮೂಲಕ ರಾಕಿಂಗ್ ಸ್ಟಾರ್ ಯಶ್ ಪ್ಯಾನ್ ಇಂಡಿಯಾ ಸ್ಟಾರ್ ಆಗಿರೋದು ಮಾತ್ರವಲ್ಲ, ಅವರು ಅಪಾರ ಅಭಿಮಾನಿಗಳನ್ನು ಸಹಾ ಪಡ್ಕೊಂಡಿದ್ದಾರೆ. ಸಹಜವಾಗಿಯೇ ಕೆಜಿಎಫ್ ನಂತರ ಯಶ್ ಅವರ ಮುಂದಿನ ಸಿನಿಮಾ ಯಾವಾಗ? ಅನ್ನೋ ಕುತೂಹಲ ಎಲ್ಲರನ್ನೂ ಕಾಡಿದೆ. ಅಲ್ಲದೇ ಆಗಾಗ ಯಶ್ ಅವರ ಹೊಸ ಸಿನಿಮಾದ ಬಗ್ಗೆ ಸುದ್ದಿಗಳು ಹರಿದಾಡಿದರೂ ಕೂಡಾ ನಟನ ಹೊಸ ಸಿನಿಮಾದ ಅಧಿಕೃತ ಘೋಷಣೆ ಮಾತ್ರ ಇನ್ನೂ ಆಗಿಲ್ಲ ಅನ್ನೋದು ನಿಜ. ಹಾಗಾದ್ರೆ ಯಶ್ ಅವರ ಮುಂದಿನ ಸಿನಿಮಾ ಯಾವಾಗ?
ಯಶ್ ಅವರ ಅಭಿಮಾನಿಗಳ ಇಂತಹುದೊಂದು ಪ್ರಶ್ನೆಗೆ ಇದೀಗ ನಟ ಯಶ್ ಅವರೇ ಉತ್ತರವನ್ನು ಕೊಟ್ಟಿದ್ದಾರೆ. ನಟ ಯಶ್ ತಮ್ಮ ಕುಟುಂಬ ಸಮೇತರಾಗಿ ಮೈಸೂರಿನ ನಂಜನಗೂಡಿಗೆ ಭೇಟಿ ನೀಡಿದ್ದಾರೆ. ಈ ವೇಳೆ ಅವರು ಮಾದ್ಯಮಗಳ ಜೊತೆ ಮಾತನಾಡಿದ್ದು, ತಮ್ಮ ಹತ್ತೊಂಬತ್ತನೆಯ ಸಿನಿಮಾದ ಕುರಿತಾಗಿ ಒಂದಷ್ಟು ಆಸಕ್ತಿಕರ ವಿಚಾರಗಳನ್ನು ಹಂಚಿಕೊಂಡಿದ್ದಾರೆ. ನಟನ ಹಿಸ ಸಿನಿಮಾ ಘೋಷಣೆ ಆಗದ ಕಾರಣ ಸೋಶಿಯಲ್ ಮೀಡಿಯಾಗಳಲ್ಲಿ ಕೆಲವರು ಈ ವಿಚಾರವಾಗಿ ಟೀಕೆಗಳನ್ನು ಸಹಾ ಮಾಡಿದ್ದುಂಟು. ಮಾದ್ಯಮದವರು ನಟನನ್ನು, ಯಶ್ 19 ಸಿನಿಮಾ ಬಗ್ಗೆ ಕೇಳಿದ ಪ್ರಶ್ನೆಗೆ ಉತ್ತರಿಸುತ್ತಾ, ‘ಹೀಗೆಲ್ಲಾ ಅದನ್ನು ಅನೌನ್ಸ್
ಮಾಡೋದಕ್ಕಾಗುತ್ತಾ? ಜನ ನನಗೆ ಆಶೀರ್ವಾದ ಮಾಡಿ ಕಳುಹಿಸಿದ್ದಾರೆ. ಅವರು ಕೊಡೋ ದುಡ್ಡಿಗೆ ಬೆಲೆ ಇರಬೇಕು. ನಾವು ಮಾಡೋ ಕೆಲಸದಲ್ಲಿ ಶ್ರದ್ಧೆ ಇರಬೇಕು. ಇಡೀ ದೇಶ ಮತ್ತು ಜಗತ್ತು ನೋಡುತ್ತಾ ಇದೆ. ಆದಷ್ಟು ಬೇಗ ಹೇಳ್ತೀವಿ ಎಂದು ನಟ ಯಶ್ ಹೊಸ ಸಿನಿಮಾ ಇನ್ನೂ ಯಾಕೆ ಘೋಷಣೆ ಆಗಿಲ್ಲ ಅನ್ನೋದಿಕ್ಕೆ ಉತ್ತರ ನೀಡಿದ್ದಾರೆ.ಇದೇ ವೇಳೆ ಅವರು, ಬಹಳ ದಿನಗಳಿಂದ ಕೆಲಸ ಮಾಡ್ತಾ ಇದೀವಿ. ಜನರು ಫ್ರೀ ಯಾಗಿ ನೋಡ್ತಾರೆ ಅನ್ನೋದಾಗಿದ್ರೆ ಮನಸ್ಸಿಗೆ ಬಂದ ಹಾಗೆ ಕೆಲಸ ಮಾಡ್ತಾ ಇದ್ದೆ. ಆದರೆ, ಅವರು ಹಣವನ್ನು ಕೊಟ್ಟು ಸಿನಿಮಾವನ್ನು ನೋಡ್ತಾರೆ. ಜನರೇ ನನ್ನನ್ನು ಬೆಳೆಸಿದ್ದು, ಈಗ ನನ್ನ ಮೇಲೆ ಜವಾಬ್ದಾರಿ ಇದೆ. ನಾನು ಒಂದು ದಿನ, ಒಂದು ಕ್ಷಣಾನೂ ವೇಸ್ಟ್ ಮಾಡ್ತಿಲ್ಲ ಎಂದು ಹೇಳಿದ್ದಾರೆ.