ಡಿವೈನ್ ಸ್ಟಾರ್ ಖ್ಯಾತಿಯ ನಟ ರಿಷಬ್ ಶೆಟ್ಟಿ ನಟಿಸಿ, ನಿರ್ದೇಶನ ಮಾಡಿದ ಕಾಂತಾರ ಸಿನಿಮಾ ಮಾಡಿದ ಮೋಡಿ ಇನ್ನೂ ಜನರ ಮನಸ್ಸಿನಲ್ಲಿ ಹಾಗೇ ಉಳಿದಿದೆ. ‘ಕಾಂತಾರ’ ಸಿನಿಮಾ ಕಂಡ ಬಹು ದೊಡ್ಡ ಯಶಸ್ಸಿನ ನಂತರ ಈಗ ಎಲ್ಲರ ಗಮನ ನೆಟ್ಟಿರುವುದು ಕಾಂತಾರ 2 ಸಿನಿಮಾದ ಕಡೆಗೆ. ಇನ್ನು ಈ ಸಿನಿಮಾಕ್ಕಾಗಿ ನಟ ರಿಷಬ್ ಶೆಟ್ಟಿ ಅವರು ತೆರೆ ಮರೆಯಲ್ಲಿ ತಮ್ಮ ಸಿದ್ಧತೆಗಳನ್ನು ಆರಂಭ ಮಾಡಿದ್ದು, ಸಿನಿಮಾ ಕೆಲಸದಲ್ಲಿ ತೊಡಗಿಕೊಂಡಿದ್ದಾರೆ. ಸದ್ಯಕ್ಕೆ ಅವರ ಸಂಪೂರ್ಣ ಗಮನ ಕಾಂತಾರ 2 ಸಿನಿಮಾದ ಮೇಲೆ ಕೇಂದ್ರೀಕೃತವಾಗಿದೆ.
ರಿಷಬ್ ಶೆಟ್ಟಿ ಅವರ ವೃತ್ತಿ ಜೀವನದಲ್ಲಿ ಅವರಿಗೆ ಮೈಲಿಗಲ್ಲು ಎನಿಸಿರುವ ಸಿನಿಮಾ ಕಾಂತಾರ ಎನ್ನುವುದರಲ್ಲಿ ಎರಡು ಮಾತಿಲ್ಲ. ಕಾಂತಾರಕ್ಕೂ ಮೊದಲು ರಿಷಬ್ ಶೆಟ್ಟಿ ಅವರು ನಟಿಸಿ, ನಿರ್ದೇಶನ ಮಾಡಿದ ಸಿನಿಮಾಗಳು ಯಶಸ್ಸನ್ನು ಪಡೆದಿವೆ. ಆದರೆ ಕಾಂತಾರ ಅವೆಲ್ಲವುಗಳ ಯಶಸ್ಸನ್ನು ದಾಟಿ, ದೇಶವ್ಯಾಪಿಯಾಗಿ ಜನರನ್ನು ತನ್ನ ಕಡೆಗೆ ಸೆಳೆದಿತ್ತು. ಪಂಜುರ್ಲಿ ದೈವದ ಕಥೆ ಮೈಮನಸ್ಸಿಗೆ ರೋಮಾಂಚನದ ಅನುಭೂತಿಯನ್ನು ನೀಡಿತ್ತು.
ಕಾಂತಾರ ಕಂಡ ಯಶಸ್ಸಿನ ನಂತರ ಸಹಜವಾಗಿಯೇ ಕಾಂತಾರ 2 ರ ಮೇಲೆ ನಿರೀಕ್ಷೆಗಳು ಹೆಚ್ಚಾಗಿವೆ. ಆದ್ದರಿಂದಲೇ ರಿಷಬ್ ಶೆಟ್ಟಿ ಸಹಾ ಕಾಂತಾರ 2 ಸಿನಿಮಾದ ಮೂಲಕ ಹೊಸದೊಂದು ಇತಿಹಾಸವನ್ನು ಬರೆಯಲು ಸಜ್ಜಾಗುತ್ತಿದ್ದಾರೆ. ಈ ಸಿನಿಮಾಕ್ಕಾಗಿ ರಿಷಬ್ ಶೆಟ್ಟಿ ಈಗ ಕುದುರೆ ಸವಾರಿ ಕೌಶಲ್ಯವನ್ನು ಮತ್ತು ಕೇರಳದ ಜನಪ್ರಿಯ ಕಲೆಯಾಗಿರುವ ಕಳರಿ ಪಯಟ್ಟುಗಳನ್ನು ಅಭ್ಯಾಸ ಮಾಡುತ್ತಿದ್ದಾರೆ ಎನ್ನಲಾಗಿದೆ.